مرحباً بك بالموقع الرسمي لأحمد أدهم

طريق السعادة المطلقة الافضل على الإطلاق



مفهوم السعادة يختلف من شخص لآخر في حاجات كتير ممكن تعملها عشان توصل التغيير بالساهل و لكن دائمًا ما يكون هناك صفة مشتركة بين الجميع.. فهناك سبيل للسعادة قوي جداا و لا يمكن ايجاد مثله مطلقًا..
القرب من الله تنمية بشرية

انا مريت بفترة كان كله مقفول فى وشى فترة اكتئاب , مفيش حاجه بتريح زى ما تدعى ربنا.. انا اول ما بدأت انتظم على الصلاة كان الموضوع صعب..
كل شويه اقوم.. طب اخلص الحته دى.. طب اما اروح هصليهم مع بعض.. برغم انى بعمل تفاهات كتير تتعدى 5 ساعات فى اليوم الا انى اما اقرر اقوم اصلى كل حاجه تتكربس فوق دماغى.. دى مش مشاغل ده "شيطان" او "النفس الامارة بالسوء"
زُق نفسك واعرف انك عمرك ما هتحقق حاجه الا بالصلى.. اعتبر نفسك فى الاول جاتلك مكالمة طارئة.. صدقنى لو رئيس جمهورية اتصل بيك لو وراك ايه هتروحله.. تصور "الآذان" ربنا بيناديك وبيقولك "حى على الصلاة, حى على الفلاح" ربنا بيقولك تعالى جدد نيتك وصفى قلبك تعالى فى السجدة حضن يغنى عن احلى حاجه فى الدُنيا..




ده الجانب الدينى.. نيجى للجانب العلمى للموضوع.. الصلاة بتطلع من جسمنا كل الطاقات السلبية وانت تعرف اكتر فى موضوع الطاقات اكتر منى وفاهم  يعنى ايه طاقة سلبية تطلع.. تعادل كتير من جلسات الاسترخاء.. ده غير انى اكتشفت ان حركات فى الصلاة زى حراكات اليوجا وانا بتمرن.. ده غير ان القرآن بيجدد آلاف الخلايا وبيساعد على تنمية المخ واصلاً لو حد عنده عُسر فى الفهم او الحفظ يبدأ بالقرآن وابحاث كتير اتعملت عن الموضوع ده.. في فيديو كنت سجلته قبل كده أفضل تمارين تنفس للراحة النفسية
طب ليه بتضيع على نفسك كل الفوائد دى وغيرها كتيييير لو دورت علشان كسل.. فى اذكار الصباح دُعاء بحبه اوى " اللهم انى اعوذ بك من الهم والحزن واعوذ بك من العجز والكسل واعوذ بك من الكُفر والبخل واعوذ بك من غلبة الدين وقهر الرجال"..



ادعى ربنا وجدد نيتك فى الدُنيا وافتكر "وما خلقت الجن والانس الا ليعبدون" وانت عارف كويس ان العبادة مش صلاة وبس دى رسالة بتأديها بعدم صلاتك انت بتكسر اساس بنيانك وكل اللى بتعمله فى حياتك هيقع.. هتخرج عن المسار اللى انت مخلوق عشانه.. الله اعلم هنعيش بُكرة ولا لاء فكّر هتقابل ربنا ازاى وانت اول رُكن بعد الشهادة مبتعملوش "الصلاة عماد الدين ومن اقامها اقام الدين" 

مش هقول اكتر من كلمات دكتور ابراهيم الفقى
عِش كل لحظه كأنها آخر لحظه فى حياتك..
عِش بالحب.. عِش بالأمل.. عِش بالتفاؤل.. عِش بالايمان.. عِش بالكفاح.. عش بالتطبع بأخلاق سيدنا محمد صلى الله عليه و سلم .. وقدر قيمة الحياة..

 تلك التدوينة هي نتاج حديث مع احدى صديقاتى اثناء نصيحتى بالصلاة..
شكرًا آلاء التهامي :)


.